Kalaallit Nunaanni Peqqinnissaqarfik immikkoortunut tallimanut agguarneqarsimavoq. Ilulissani, Aasianni, Sisimiuni, Nuummi kiisalu Qaqortumi qitiusumik napparsimmaveqarpoq. Napparsimmavillu Nuummiittoq, Dronning Ingridip Napparsimmavissua, Kalaallit Nunaanni nuna tamakkerlugu napparsimmaviuvoq. Nunap ilaani tamani peqqissaaveqarpoq, napparsimmaveeraqarluni nunaqarfinnilu nakorsiartarfeqarpoq ilaatigut qarasaasiakkut nakorsiartitsiveqartunik.
Nunap innuttaasuinut peqqinnissaqarfiup sullissineri tunngaviusumik tamarmik akeqanngillat. Nakorsaatit allagartalerlugit pisassat naartunaveersaatillu najugaqavissunut akeqanngillat. Illoqarfinni annerusuni amerlanerni peqqinnissaqarfinnit ingerlanneqartunik kingutileriveqarpoq, kingutileritinnerlu najugaqavissunut aamma akeqanngilaq.
Innuttaasut ilai peqqissaavinnit immikkoortumiluunniit napparsimmavimmut ungasissuni najugaqarput. Napparsimasoqartillugu innuttaasut napparsimmavimmut qaninnerpaamut nakorsiartinneqartarput. Napparsimasut immikkut katsorsarneqarnissaminnik pisariaqartitsisut, assersuutigalugu kræftertut, Dronning Ingridip Napparsimmavissuanut Nuummiittumut imaluunniit Danmarkimut katsorsartikkiartortarput. Tassanngaannartumik peruluttoqartillugu Islandimi napparsimmavimmut aallartitsisoqarsinnaavoq.