Ilinniartitaaneq

Kalaallit Nunaanni innuttaasut ukiut qulit meeqqat atuarfianni atuarsimasussaatitaapput. Meeqqat ukiumi arfinilinnik ukioqalerfimminni atuartunngortarput. Nunaqarfinni minnerusuni meeqqat 8.-10. klaserniarlutik illoqarfimmut qaninnermut nuukkajuttarput. 10. klassimik naammassinnereernerup kingorna atuartut affaasa missaanniittut Kalaallit Nunaanni Danmarkimiluunniit ukiumik ataatsimik sivisussuseqartumik efterskolernermik aallartitsisarput. Atuartut arfineq-marluugaangata ataaseq kisimi inuusuttunut ilinniarfimmut toqqaannartumik ingerlaqqittarpoq.

Illoqarfiit sisamat ilinniarnertuunngorniarfeqarput, inuussutissarsiornermilu ilinniarfinni quliusuni inuussutissarsiornermi ilinniakkat amerlanerpaat ilinniarneqarsinnaapput. Inuussutissarsiornermi ilinniakkat atuagarsornermik suliffimmillu misiliinermik akulerunneqarsimasunik imaqarput.

Kalaallit ilinniartut agguaqatigiissillugu 20-nik ukioqarlutik ilinniarnertuunngorniarnermik aallartitsisarput, agguaqatigiissillugulu 26-nik ukioqarlutik inuussutissarsiornermi ilinniakkamik aallartitsisarlutik.

Kalaallit Nunaanni universiteti, Ilisimatusarfik, illoqarfiit pingaarnesaanni Nuummi inissisimavoq. Tassani bacheloritut ilinniakkat 11-t kandidatitullu ilinniakkat pingasut ilinniarneqarsinnaapput. Ingerlariaqqiffiusumik ilinniakkat naannerusut inuussutissarsiornermi ilinniarfiit ilaanni aamma ilinniarneqarsinnaapput.

Ingerlariaqqiffiusumik ilinniakkat Kalaallit Nunaanni neqeroorutigineqartut arlaqanngimmata, ilinniartut 30 pct.-iisa missaanniittut nunani allani ilinniartuupput, taakkunannga amerlanerit Danmarkimi. Ilinniarneq akeqanngilaq, ilinniartulluilinniagaqarnersiuteqartinneqarput. Suliffimmi misiliillutik ilinniartut suliffimmi misiliisutut akissasiaqartinneqartarput.