1. Aallaqqaasiut
Kisitsisitigut paasissutissani matumani
Kalaallit Nunaanni suliffeqarnermi sulisut nassuiarneqarput. Kalaallit Nunaanni
suliffeqarnermi kisitsisitigut paasissutissat killiffimmi naatsorsuutaapput,
tassanilu inuit (ataasiakkaarlugit) qaammatip ataatsip ingerlanerani
minnerpaamik akunnerit arfineq-pingasut sulisimasut kiisalu ukiup ataatsip
ingerlanerani qaammammut agguaqatigiissillugu sulisimasut amerlassusaat
naatsorsorneqarput.
Suliffeqarnermut kisitsisitigut paasissutissani
Kalaallit Nunaanni innuttaasut ukiup naanerani 15-ileereersimasut
tunngavigalugit suliarineqarput. Saqqummersitami matumani piffissami 2014-imiit
2018-imut suliffeqarneq pillugit kisitsisit saqqummiunneqarput.
Kalaallit Nunaanni suliffeqarneq pillugu
kisitsisit sapinngisamik najoqqutassat
The International Labour Organisation-imit
(ILO), FN-ip ataani nunat tamalaat akornanni suliffeqarnermut tunngasuni
kattuffimmit nassuiarneqarsimasut malillugit suliarineqarput. ILO-mit
suliffeqarneq pillugu nassuiaat kiisalu najoqqutassiat immikkoortumi 4.1-imi
atuarneqarsinnaapput.
Saqqummersitaq immikkoortunut pingasunut,
ataatsimut immikkulluunniit atuarneqarsinnaasunut, immikkoortiterneqarpoq.
Immikkoortut aappaanni suliffeqarneq pillugu nalunaarsuisarfimmiit
naatsorsuutit pingaarnerit saqqummiunneqarput. Nunami sumiiffiit aamma
inuiaqatigiit agguataarneri malillugit Kalaallit Nunaanni suliffeqarnermi
pissutsit misissoqqissaarneqarnerat immikkoortumi matumani sammineqarput.
Kisitsisini najoqqutarineqartut kiisalu
nalunaarsuutit allat atorneqartut immikkoortut pingajuanni
atuarneqarsinnaapput, najoqqutassialli aammalu suliffeqarnermut nassuiaat,
periaatsip nassuiarnera, kukkunernullu tunngaviusut il.il immikkoortut
sisamaanni atuarneqarsinnaapput.
Piffissami 2008-miit 2018-imut Kalaallit
Nunaanni suliffeqarnermi pissutsinut kisitsisit sukumiinerusut
Naatsorsueqqissaartarfiup Kisitsisaataasiviani nittartakkami bank.stat.gl –imi nassaarineqarsinnaapput.
Kisitsisaataasivimmi uuttuutinik nammineq toqqartuilluni soorlu ukiut,
suiaassuseq, najugaqarfik, inunngorfik aamma ilinniakkap qaffasissusaa
malillugu tabeliliortoqarsinnaavoq.
Saqqummersitamik
uannga nutarterineq
Suliffeqarneq pillugu kisitsisit
saqqummersitami matumani saqqummiunneqartut aammalu Naatsorsueqqissaartarfiup
Kisitsisaataasivianiittut siornatigut saqqummersinneqarsimasuniit
allaanerusinnaapput, pingaartumik suliaqarfiit malillugit suliffeqarnermut
kisitsit. Tamanna Kalaallit Nunaanni Inuussutissarsiutinik Ingerlataqartunut
Nalunaarsuiffiup (GER)1. januaari 2018-imi Det Centrale
Virksomhedsregister-imik (CVR) taarserneqarnerata kingunerisaanik suliaqarfinni
taaguutit nutaat atuutsinneqalernerannik peqquteqarpoq. Suliaqarfinnut
taaguutinut atorneqartup nutaap DB07-imik taasap siornatigut Kalaallit Nunaanni
suliaqarfinnut atorneqartoq GB2000-imik taaneqartoq taarserpaa. Suliaqarfinnut
taaguutinut atorneqartup DB07-ip atuutsinneqalernerata kingunerisaanik
suliffeqarnermut tunngasut kisitsisit paasissutissat siunissami suliaqarfinnut
pingaarnernut amerlanerusunut kiisalu allaanerusunut naatsorsorlugit
saqqummersinneqartalissapput. Db07-imik atuutsitsilerneq suliffeqarnermi
kisitsisini 2008-miit 2018-imoortuni tamani atorneqarpoq.