ILINNIARTITAANEQ

Kalaallit Nunaanni ilinniartitaanerup aaqqissuussaanerani siunertaavoq, inuusuttut ilinniartitaanissaat, siunissami sulinissamut tunngaviliisussamik, imminut inuttut ineriartornermik aammalu inuiaqatigiit tassanilu ineriartornermut paasinninnissamut.

1981-mi Namminersornerullutik Oqartussat Inuussutissarsiutinut ilinniartitaanernik tigusimmata naalakkersuinikkut aalajangerneqarpoq inuussutissarsiutinut tunngaviusumik ilinniarnerit tamarmik sapinngisamik Kalaallit Nunaanni ingerlanneqassasut.

1980-ikkut ingerlanerini inuussutissarsiutini pingaarnerni tamani ilinniarfiit nuunneqarput. Taamaattumik ilinniarnermi sungiusarnerit atuagarsornerillu Kalaallit Nunaanni maanna ingerlanneqarlutik.

Maannakkut Qaqortumi, Narsami, Paamiuni, Nuummi, Maniitsumi, Sisimiuni Ilulissanilu qitiusunik ilinniarfeqarpoq aammalu sinerissami arlalinnik nunap immikkoortuini ilinniarfeqarluni.

Ilinniarfiit arlaqartut kalaallit nunaata avataani suli ingerlanneqartarput. Tamanna inuussutissarsiutinut ilinniartitaanernut ataasiakkaanut aamma ilinniarfinni sivikinnerusumik sivisunerusumillu ingerlaqqiffiusuni atuuppoq.

Ilinniartoq ilinniarfissamini inuussutissarsiutinut tunngaviusumik ilinniarfimmi aallartissinnaajumalluni suliffeqarfimmik ilinniarfissaminik isumaqatigiissuteqassaaq. Tunngaviusumik ilinniarnerit amerlanersaat ilinniarnertut nikerartutut ingerlanneqartarput, ilinniartoq qitiusumik ilinniarfinni atuagarsorluni sungiusaatigalugulu sulinermi nikerartarluni. Niuernermi allaffissornermilu ukiuni marlunni siullerni ilinniartitsineq niuernermut ilinniarfinni aamma nunap immikkoortuini ilinniarfinni ingerlanneqartarpoq.

Aammattaaq pikkorissartitsinernut tunngasuni ineriartortoqarpoq, qitiusumik ilinniarfiit inuussutissarsiutinut ilinniaqqinnernik annertunerusumik ingerlatsisalermata, pikkorissartitsinernut ataasiakkaanut aammalu immikkoortortalersukkanut qaffakkiartuaartumik ilinniartitsinernut, piginnaalersitsisumik pikkorissartitsinernut assersuutigalugu qaartiterisartutut aammalu entreprenøritut ilinniarnerit, kiisalu Alloriarneq (allaffimmiut ilinniaqqiffiat).