Pisarineqartartut
Piniarnermik inuussutissarsiutillit sunngiffimmilu piniartartut namminneerlutik pisarisimasatik, 1993-mi aallartittumik Aalisarnermut, Piniarnermut Nunalerinermullu Naalakkersuisoqarfimmut nalunaarutigisalerpaat. Pinisarisimasat tamarmik “ukiumoortumik immersugassami” immersuilluni nalunaarutigineqartussaapput, immersugassaq “Piniarneq” piniarnermut allagattaq ilanngullugu nassiunneqartarpoq.
Pisarineqartut pillugit paasissutissat ukiumoortumik immersuiffissanit pisuupput, taakkulu piniartunit ataasiakkaanit immersorneqartarput. Piniarnermut allagartaq nutaaq tunniunneqartinnagu piumasaqaataavoq piniartup ukiumoortumik immersuiffik piniartup Aalisarnermut, Piniarnermut Nunalerinermullu Pisortaqarfimmut nassiussimassagaa. Tabel 10-mi takuneqarsinnaavoq 2012-mi allagartanik pigisaqartut 83 procentii ukiumoortumik immersuiffik nassiussimagaat. Nannunik, tikaagulliusaanik, arfivinnik, qipoqqanik, tikaagullinnik, aarrinik, tuttunik umimmannillu pisaqartoqarsimatillugu akuersissummik pigisaqartoq immersuiffissamik immikkut ittumik immersuisussaavoq.
Puisi tassaavoq pisarikkajunnerpaaneqartoq. 2011-mi puisit 139.309-it pisarineqarput. Puisit pisarineqartut amerlanersaat natsiullutillu aataarsuupput. 2011-mi natsiit 61.957-it aataarsuillu 73.905-it pisarineqarput, takuuk tabel 11.
Titartagaq 8.1. Arfernit mikinernit pisat
Malugiuk: Kisitsisit 2012-mi arferit mikinerit (niisat aamma niisarnat) kisitsisitaat kisitsisaagallarput. Qilalukkat qernertat qaqortallu pisaanerisa kisitsisitaat toqqaannartumik pisassarititanut naleqqissuunneqarsinnaanngillat. 2011-mi pisat amerlassusaasa ukiup aallaqqaataaniit decembarip naaneranut nalunaarsugaalerput.
Najoqqutaq: Aalisarnermut Piniarnermut Nunalerinermullu Naalakkersuisoqarfik
Niisat pisarineqartartut amerlassusaat ukiunit qulini kingullerni amerleriapiloorsimapput. Qilalukkat qernertat qaqortallu pisarineqartut ikileriarsimapput, pisassiissutiteqartalerneq malitsigalugu. Tabel 11-mi takuneqarsinnaapput uumasut assigiinngitsut ukiuni kingullerni arfinilinni pisarineqartut.
Nannut pisarineqartut amerlassusaat 2003 tikillugu amerleriarsimapput 2003-p kingorna nannut pisarineqartut ikiliartulersimapput, takuuk tabel 11. 2006-miit nannunik piniarneq killilersugaalerpoq. Nannut amerlanersaat Avannaani Tunullu avannaani pisarineqartarput, takuuk tabel 12.