Pisarineqartartut
Piniarnermik inuussutissarsiutillit sunngiffimmilu piniartartut namminneerlutik pisarisimasatik, 1993-mi aallartittumik Aalisarnermut, Piniarnermut Nunalerinermullu Naalakkersuisoqarfimmut nalunaarutigisalerpaat. Pinisarisimasat tamarmik “ukiumoortumik immersugassami” immersuilluni nalunaarutigineqartussaapput, immersugassaq “Piniarneq” piniarnermut allagattaq ilanngullugu nassiunneqartarpoq. www.sullissivik.gl atorlugu nammineerluni aamma immersuisoqarsinnaavoq.
Pisarineqartut pillugit paasissutissat ukiumoortumik immersuiffissanit pisuupput, taakkulu piniartunit ataasiakkaanit immersorneqartarput. Piniarnermut allagartaq nutaaq tunniunneqartinnagu piumasaqaataavoq piniartup ukiumoortumik immersuiffik piniartup Aalisarnermut, Piniarnermut Nunalerinermullu Pisortaqarfimmut allakkatigut imaluunniit nittartakkakkut immersuinikkut nassiussimassagaa. Tabel 10-mi takuneqarsinnaavoq 2014-imi allagartanik pigisaqartut 79 procentii ukiumoortumik immersuiffik nassiussimagaat. Nannunik, tikaagulliusaanik, arfivinnik, qipoqqanik, tikaagullinnik, aarrinik, tuttunik umimmannillu pisaqartoqarsimatillugu akuersissummik pigisaqartoq immersuiffissamik immikkut ittumik immersuisussaavoq.
Puisi tassaavoq pisarikkajunnerpaaneqartoq. 2013-mi puisit 149.426-it pisarineqarput. Puisit pisarineqartut amerlanersaat natsiullutillu aataarsuupput. 2013-imi natsiit 64.845-it aataarsuillu 81.946-it pisarineqarsimapput, takuuk tabel 11.
Titartagaq 8.1. Arfernit mikinernit pisat
Malugiuk: Kisitsisit 2014-imi arferit mikinerit (niisat aamma niisarnat) kisitsisitaat kisitsisaagallarput. Qilalukkat qernertat qaqortallu pisaanerisa kisitsisitaat toqqaannartumik pisassarititanut naleqqissuunneqarsinnaanngillat Tunumi pisat ilaanngunneqarsimaneri pissutaallutik. 2001-imiit 2005-imut kisitsisit Piniarneq-mit pissarsiaapput. 2006-imit 2014-imut kisitsisit immikkut nalunaarutinit pissiarsiaapput.
Najoqqutaq: Aalisarnermut Piniarnermut Nunalerinermullu Naalakkersuisoqarfik
Niisat pisarineqartartut amerlassusaat ukiunit qulini kingullerni taamaaginnangajassimapput. Qilalukkat qernertat qaqortallu pisarineqartut ikileriarsimapput, pisassiissutiteqartalerneq malitsigalugu, ukiut piniarfiusut marluk akornanni nuussisalernerit pissutaallutik qilalukkanik qaqortanik aamma qilalukkanik qernertanik pisassiissutit amerliartulaarput. Tabel 11-mi takuneqarsinnaapput uumasut assigiinngitsut ukiuni kingullerni arfinilinni pisarineqartut.
Nannut pisarineqartut amerlassusaat 2003 tikillugu amerleriarsimapput ikiut arfineq pingasut kingulliit pisarineqartartut taamaaginnaarput, takuuk tabel 11. 2006-miit nannunik piniarneq killilersugaalerpoq. Nannut amerlanersaat Avannaani Tunullu avannaani pisarineqartarput, takuuk tabel 12.