Nalunaarsuutit tunngaviusut

Nalunaarsuutit najoqqutaralugit atorneqartut tassaapput:

 

·         Ilinniartitaanermut Naalakkersuisoqarfiup Kalaallit Nunaanni efterskolini atuartunut nalunaarsuiffia.

·         Oqaasileriffiup Danmarkimi efterskolini atuartunut nalunaarsuiffia.

·         Naatsorsueqqissaartarfiup innuttaasunut nalunaarsuiffia.

 

Kalaallit Nunaanni efterskolit aallarnisarneqalerneranniilli nalunaarsuutit nassaassaapput. Efterskole Villads Villadsen ukiumi atuarfiusumi 2009/2010-mi ammarneqarpoq Maniitsumilu Efterskoli ukiumi atuarfiusumi 2011/2012-imi ammarneqarluni. Ukioq atuarfiusoq 2010/2011 sioqqullugu qallunaat efterskoliini naammassinninnerit unitsitsinerillu nalunaarsuuteqanngillat, taamaattumik qallunaat atuarfiini efterskolernernut naatsorsuutit ukiumi pineqartumi aallartipput.

 

Periaaseq

Efterskolernernut nalunaarsuutit naleqquttut ukiumi atuarfiusumi aallartitsinerit, unitsitsinerit naammassinninnerillu malillugit immikkoortiterneqarput. Ukiumi atuarfiusumi ataatsimi atuartoq ataatsimit amerlanerusunik efterskolernernik ingerlatsisimasutut allaqqasinnaavoq, unitsitsereernermi efterskolimi allami aallartitseqqissimaguni.

Atuartut ukiui ukiup pineqartup naanerani naatsorsorneqarput, 16-illu inorlugit ukiulinnut, 16-inik ukiulinnut, 17-inik ukiulinnut kiisalu 17-ileereersimasunut immikkoortiterneqarlutik.

Naatsorsueqqissaartarfiup innuttaasunut nalunaarsuisarfiani atualinnginnermi illoqarfik nalunaarsorneqarsimasoq kingulleq atorlugu atuartut illoqarfinnut atassuserneqarput. Atuartut atualinnginnermi innuttaasunut nalunaarsuisarfimmi nassaarineqanngitsut kalaallit efterskoliinut imaluunniit qallunaat efterskoliini atuartuuppata paasissutissaqanngitsutut nalunaarsorneqarput.

Atuartut efterskolernernik aallartitsisimasut ukioqatigiinni inuit amerlassusaannut naleqqiullugit aamma naatsorsorneqarput. Ukioqatigiit innuttaasunut nalunaarsuisarfimmi ukioq 14-inik ukioqalerfiat malillugu naatsorsorneqarput. Efterskolini atuartut nukarlersaat ukiumi 15-inik ukioqalerfimminni aallartittarnerannik aammalu efterskolini atuartut Kalaallit Nunaatalu avataani ilinniartut innuttaasunut nalunaarsuisarfimmi allaqqannginnerinik tamanna peqquteqarpoq.

 

Naatsorsuineq

Atuartut ukiup atuarfiusup naanerani killiffiat, ukioq atuarfiusoq, efterskoli, suiaassusseq, ukiut aammalu illoqarfik malillugit agguaanneqarput.

Taamatullu ukioqatigiinni atuartut efterskolernernik aallartitsisimasut/naammassinnissimasut amerlassusaat naatsorsorneqarput.

 

Killiliinerit erseqqissagassallu

Atuartoq ukiup atuarfiusup ataatsip iluani ataatsimit amerlanerusunit efterskolernernik ingerlatsisimasutut allaqqasinnaavoq, unitsitsereernerup kingorna efterskolimi allami aallaartitseqqissimaguni.

Kisitsisaataasivimmi ukioqatigiit malillugit kisitsisit naatsorsukkat ukiut tamaasa allanngortassapput, ukioqatigiinni suli amerlanerusut kingusinnerusukkut efterskolernernik aallartitsisimappata.