Siunertaq
Inuussutissarsiornermi
ilinniakkat amerlanersaat suliffimmik ilinniarfissarsinermi aatsaat
aallartinneqarsinnaasarput. Suliffiit ilinniarfiusinnaasut amerlassusaat
taamaasillutik inuussutissarsiornermi ilinniarfinni ilinniartut amerlassusaasa ineriartornerannut sunniuteqartarpoq.
Ilinniartunut inissat pillugit kisitsisitigut paasissutissat ilinniartitaanermi
inuussutissarsiornermi ilinniakkanut paasissutissanik annertunerusunik
suliaqarnissaq anguniarlugu ineriartortinneqarput. Taamaasilluni aamma
suliaqarfiit qanoq annertutigisumik ilinniartuuteqarnerat taakkulu qanoq
ineriartornerat takussutissiarineqarluni.
Nalunaarsuutit
tunngaviusut
Ilinniagaqarnersiuteqartitsivimmit
ilinniartut tapiinut akiliutit nalunaarsuutaat atorlugit kisitsisitigut
paasissutissat naatsorsorneqarput. Tapiissutit qaammatikkaartumik
suliffeqarfimmut ataatsimut/ilinniartumut ataatsimut akilerneqartarput. Tapinut
akit aningaasaqarnermut inatsimmi aaliangersarneqartarput, ilinniakkallu
kiisalu ukioq ilinniarfiusoq malillugit allanngorartarlutik(takuuk konto
pingaarneq 40.02.06, ilinniarnermi tapiissutit meeqqanullu tapit pillugit
nassuiaat).
Kisitsisini
ilinniartut ilinniarfimminni suliffimmik misiliisut ilaanngillat, tassani
pineqarput inuussutissarsiornermi ilinniakkami, ilinniarfimmi ilinniartunik
suliffimmi misiliinissamut tigooraasartuni, akuerisaasimasut.
Inuussutissalerinermi ilinniarfimmi INUILI-mi kiisalu
KTI-mi teknikimik ilinniarfinni tamanna periarfissaavoq.
Periaaseq
Qaammatikkaartumik
ilinniartunut tapiissutit najoqqutaralugit ilinniartut amerlassusaat
naatsorsorneqarput. Tapiissutini kukkunerit kiisalu akilerneqarsimanngitsut
ukiumi naatsorsuiffiusumi tullermi qaammat marsi tikillugu naqqissorneqarput.
2018-imi
januaarip aallaqqaataat aallarnerfigalugu Kalaallit Nunaanni suliffeqarfiit
suliffeqarfinnut qitiusumik nalunaarsorsimaffimmut (CVR) nalunaarsorneqarput.
Suliaqarfiit pingaarnerit suliaat malillugit immikkoortiterineq
DB07 naliginnaasumik tassani atorneqarpoq. Siornatigut suliffeqarfiit
Inuussutissarsiutinik Ingerlataqartunik Nalunaarsuiffimmi (IIN)
nalunaarsuinermi suliaqarfinnik immikkoortiterineq
alla; GB2000 atorneqartarsimavoq.
Ilinniartunut
tapiissutit nalunaarsuutaat ilinniagaqarnersiuteqartitsivimmit nalunaarsuutinut
naleqqiullugit misissorneqarput, ilinniarnermi suliffeqarfimmi ilinniartuuneq
immikkoortinniarlugu.
Naatsorsuineq
Ilinniartunut
kisitsisitigut paasissutissat qaammatikkaartumik kiisalu suliaqarfinnut
ilinniakkamilu sammisanut (ISCED Fields of Education 2013)
najugaqarfinnullu agguataarlugit naatsorsorneqarput. Tabelit tamarmik
suiaassutsit ukiullu malillugit aaneqarsinnaapput.
Suliffeqarnermi
kisitsisitigut paasissutissani iluarsaassineq
Suliffeqarnermi
kisitsisitigut paasissutissani saqqummersuni kingullerni 2016-imiit
ullumikkumut kisitsisit suliarineqarneri nutarsarneqarput. Tamatumalu
kinguneraa suliffeqarnermut kisitsisit siuliani saqqummiunneqartarsimasunit
annertunerulernerat.
Siornatigut
saqqummersinneqarsimasunit periaatsimi allannguutit pingaarnerit tassaapput:
·
Ernereernerup
kingorna sulinngiffeqartut, suliffilinnut ilaasimasut massakkut suliffilittut
naatsorsorneqarput. Allannguummi matumani International Labour
Organization-imit (ILO) innersuussutigineqartunut
naapertorlugit suliffeqarnermi pissutsinut kisitsisitigut paasissutissat
suliarineqarput.
·
Ukiup
ataatsip ingerlanerani isertitat annerpaartaat namminerisamik suliffeqarfimmit
isertitaasimappata, suliffeqarfiup inuussutissarsiornermi suliaqarfiani
pingaarnertut suliffeqarneq naatsorsorneqarpoq. Allannguummi matumani piffiit
tunisiffiusimanngitsut imaluunniit inuussutissarsiornermi suliaqarfinni allani
ilassutitut isertitaqangaatsiarsimaneq pingaarnertut suliffimmut
sunniuteqanngillat, ukiumut isertitat aalisarnermi imaluunniit savaateqarnermi
namminerisamik suliffeqarfimminngaanneersuuppata.
·
Naatsorsueqqissaartarfik
pisortat akissarsialeriviannit nalunaarsuutinik
nutaanik, sulisitsisullu Akileraartarnermut Aqutsisoqarfimmut nalunaarusiaannik
paasissutissanik sukumiinerusunik imalinnik aallersinnaalerpoq.
Nalunaarsuutinik pitsaanerusunik aallersinnaaneq pisortani atorfeqarnermi
akissarsiat pisortanit isertitaniit qularnannginnerusumik immikkoortinneqarsinnaalernerannik
isumaqarpoq. Allannguutillu kinguneraa qaammammi ataatsimi piffissap affaanit
sivikinnerusumik sulillutik atorfeqarsimasut suliffilinnut ilanngunneqarnerini
pisortani suliffillit annertunerulernerat.
Killiliineq
kisitsisinilu ilanngunneqanngitsut
Kisitsisitigut
paasissutissani inuussutissarsiornermi ilinniarfinni ilinniartut suliffinnilu
ilinniartuunermut tapisisartut kisimik pineqarput. Inuussutissarsiornermi
ilinniarfinni ilinniartunut taamaallaat tapiissutit tunniunneqartarput.
Taamaattumik ilinniartut kisitsisini matumani saqqummiunneqartuni ilaanngitsut
tassaapput:
·
Ilinniartut
inersimasut.
·
Ilinniartut
ilinniagaqarnersiutillit, ass. inulerinermi ikiortit,
ulluunerani neqeroorutini ikiortit aamma peqqissaanermi ikiortit.
·
Ilinniartut
atuarfimminni suliffimmik misiliisut.
·
Ingerlariaqqiffiusumik
ilinniarfinni ilinniartut suliffimmik misiliisut, ass.
ilisimatusarluni ilinniakkani.