Nunanik allanik niueqateqarneq

Kalaallit Nunaanni ataasiakkaaginnarnik tunisassiortoqartarpoq, atortussallu assigiinngitsorpassuit pisariaqartinneqartarmata avataaniittunik niueqateqarnissaq annertuumik pisariaqartinneqarpoq. Aalisarneq piniarnerlu eqqarsaatigissanngikkaani Kalaallit Nunaanni nammineq pilersorneq annikitsuinnaavoq. Taamaattumik angerlarsimaffinnut, suliffeqarfinnut paaqqinnittarfinnullu atortussat tamangajammik avataanit tikisinneqartarput.

Kalaallit Nunaannit avammut tunineqartartuni aalisakkat qaleruallillu annertunerpaapput, taakkulu nunani tamalaani pisinerni akitiginneqartunit sunnerneqartarput. Nunanut allanut tunisat 90 pct.-ii sinnerlugit aalisakkerinermeersuupput. Avammut tunineqartartut pingaarnerit tassaallutik saarulliit, qalerallit, avaleraasartuut, saattuat kinguppaallu.