Takornariaqarneq

Nunanut tamalaanut timmisartut aqqutigisartagaat Ilulissat, Kangerlussuaq, Nuuk, Narsarsuaq, Kulusuk aamma Ittoqqortoormiini Nerlerit Inaat aqqutigalugit imaluunniit umiarsuarnut takornariartaatinut ilaallutik takornarissat tikittarput. Kalaallit Nunaannut tikinnermi timmisartumik umiarsuarmilluunniit ingerlaqqittoqartarpoq.

Unnuiffigineqarsinnaasut assigiinngiiaarput; illoqarfinni akunnittarfinniit bed and breakfastinut nunaqarfinnilu angerlarsimaffinni illusimaffinnut. Tammaartoqarsinnaavoq, piareersarluarsimanissarli tassani pisariaqarluinnarpoq.

Avannaa, pingaartumik Qeqertarsuup Tunua, issittuuvoq takornarissanillu ornigarneqarnerpaasarluni. Tamaani takornariaqartitsineq ineriartortinneqarluarsimasuuvoq takornarialerisullu amerlanerpaat tamaaniillutik. Kitaani illoqarfiit pingaarnersaat inissisimavoq, tamaanilu angallannikkut pissutsit ineriartorluartitaapput. Takornariaqarnerlu nutaaliaanerusumik illoqarfinni inuunermik, piorsarsimassutsikkut pissutsinik pinngortitalerinermillu imaqarpoq. Kujataa issittup kiannerulaartortaani inissisimalluni nunap sinneranit allaaneruvoq oqaluttuarisaanermilu pisimasunik pinngortitami issaasattumik silaannalinni misigisassaqartitsivoq. Tamaaniipportaaq Kalaallit Nunaanni nunalerinermik ingerlatsineq annerpaaq. Kangia Kalaallit Nunaanni avinngarusimanerpaatut inissisimavoq, avannaa assigalugu, issittuulluni. Nunap ilarujussua inuialaarsuuvoq avataanit sunnerneqarsimanngitsoq, inuillu piorsarsimassutsikkut inuunerat ileqqutoqqanit tunngaveqarnerusoq sumiiffinnut allanut naleqqiullugu paarilluagaq tamaaniippoq.

Pinngortitami takornariartitsineq aasakkut ingerlanneqarnerusarpoq, ukiaaneranili aamma ingerlanneqartartunik peqarpoq. Umiarsuit takornariartaatit nalinginnaasumik upernaamiit ukiaq tikillugu tikerartarput. Ikittuinnaat sermersuaq ituittarpaat, nalinginnaasumik Kangerlussuarmiit Tasiilamut, tamannali Namminersorlutik Oqartussanit immikkut ittumik akuersissutigineqaqqaassaaq.