3. Najoqqutat

Suliffeqarnermi kisitsisitigut paasissutissat najoqqutat assigiinngitsut suliaralugit nalunaarsuisarfimmut Kalaallit Nunaanni suliffeqarnermut paasissutissanik matussusiisunik ataatsimoortitsilluni suliarineqartarput. Immikkoortumi matumani kisitsisini najoqqutarineqartut ataasiakkaat nassuiarneqarput.

 

Qaammammut nassuiaatit nalunaarsuutillu

Suliffeqarfiit Akileraartarnermut Aqutsisoqarfimmut qaammammut nassuiaataat nalunaarsuutaallu kisitsisini najoqqutarineqarput. Qaammammut nassuiaatit suliffeqarfiit ataasiakkaat qaammammi tamakkiisumik akissarsianut aningaasartuutaat, taakkunanngalu qanoq annertutigisumik akileraarutaat suliffeqarfeqarnermullu akileraarutaat ilanngullugit. Suliffeqarfiit qaammammut nassuiaataanni sukumiisuni aningaasarsiat akileraarutigineqartullu sulisunut ataasiakkaanut agguarlugit nalunaarusiaapput. Qaammammut nassuiaatit suliffeqarfinnut tunngasuupput, qaammammullu nalunaarsuutit sulisunut tunngasuullutik, nalunaarsuinerillu taakku imminnut atassuteqarput.

 

Inuit isertitaannut nalunaarsuisarfik

Qulaani najoqqutani pineqartuni suliffilinnut tamakkiisumik matussusiinngillat. Ilaatigut namminersorlutik inuussutissarsiutinik ingerlatsisut ilaanngillat. 2015 sioqqullugu qaammammut nalunaarsuutaasartuni aamma sulisut Danmarkimi nalunaarsorneqarsimasumik sulisitsisullit ilaanngillat. Sulisulli kisitsisaat qaammammut nalunaarsuutini ilanngunneqarsimanngitsut isertitaanni A-ni paasissutissaat namminersortutullu Naatsorsueqqissaartarfiup inuit isertitaannut nalunaarsuisarfianut, Akileraartarnermut Aqutsisoqarfimmut ukiumut nammineq nalunaarsuiffinnik tunngaveqartumut, ilanngunneqartarput.

 

Kommuninit isertitanut taarsiissutitaasunik ikiorsiissutit

Pisortani ingerlatsineranni kiffartuussinerisalu iluani sulisut annertussusaat killilerniarlugu Naatsorsueqqissaartarfiup isertitanut taarsiissutaasunut ikiorsiissutinut nalunaarsuisarfia pingaaruteqarluinnarpoq. Qaammammut nalunaarsuutini akissarsiat aammalu aningaasat tunniunneqartut suliffeqarnermut attuumassuteqanngitsut nalunaarsuisarfimmi immikkoortinneqarsinnaapput.

 

Qitiusumik Suliffeqarfinnik Nalunaarsuiffik

Qitiusumik Suliffeqarfinnik Nalunaarsuiffik (CVR) atorlugu suliffeqarfiit ataasiakkaat inuussutissarsiorfinni paasissutissaat aaneqarput, taamaasilluni suliffillit inuussutissarsiutinut immikkoortiterneqarsinnaalerlutik. CVR-imi suliffeqarfiit nalunaarsorsimasut tamarmik suliaat pingaarnerit malillugit suliaqarfinnut inissitsiterneqartarput. Suliaqarfiillu paasissutissaat Dansk Branchenomenklatur (DB07) malillugu immikkoortiterneqartarput.

 

Suliffeqarnermi kisitsit paasissutissaanni suliaqarfiit agguataarnerat annikitsumik naleqqussarneqarpoq. Kisitsisini inuussutissarsiorfiup annerpaap CVR-imi suliaqarfiit agguataarneqarat naleqqatiginngimmagu. Naleqqussaanermi peqqutaavoq suliffeqarfiit annerit – pingaartumik aalisarnermut, toqqaannartumik toqqaannanngitsumillunniit aalisarnerup iluani attuumassuteqartut – CVR-imi suliaqarfinni allani nalunaarsorsimanerat. Tamanna - naleqqussaasoqartinnagu – suliaqarfinni ataasiakkaani suliffillit – pingaartumik aalisarnerup iluani – annikippallaarnerannik isumaqarsinnaavoq, suliaqarfinnilu allani – pingaartumik niuernermi suliffissuaqarnermilu – killormut suliffillit annertuallaalernerannik isumaqarsinnaalluni.

 

Suliaqarfinnut naleqqussaanermi suliffeqarfiit ataasiakkaat suliaqarfiat malillugu allanut inissinneqarput. Inuussutissarsiorfillu Aalisarneq aalisakkanillu tunisassiorneq niuernerlu, aalisartut saniatigut aamma suliffeqarfinnik aalisakkanik piareersaanermik, niuernermik nioqqutissiornermillu suliaqartunik ilaneqarpoq. Taamatuttaaq inuussutissarsiorfik Nunalerineq, orpippassualerineq nunalerinermilu tunisassiorneq, suliffeqarfinnik nersutaatinik toqoraanermik suliaqartunik ilaneqarpoq. Kiisalu inuussutissarsiorfik Aatsitassarsiorneq, suliffeqarfiit aatsitassarsiornermik ingerlatsisut saniatigut aamma suliffeqarfinnik aatsitassarsiornermut toqqaannartumik atassuteqartunik assersuutigalugu aatsitassanik misissuinernik suliaqartunik ilaneqarpoq.

 

Erseqqissumik oqaatigalugu suliaqarfinnik naleqqussaaneq suliffeqarfiit suliaqarfinni ilisarnaataat (DB07) imaluunniit CVR-normui malillugit ingerlanneqarpoq.

 

Suliaqarfinnik naleqqussaaneq, inuussutissarsiorfinnut nutaanut immikkoortiterinerit

DB07 Suliaqarfiup ilisarnaataa	CVR-normu Suliffeqarfik	Inuussutissarsiorfimmiit	Inuussutissarsiorfimmut
10.11.90	-	Nioqqutissiorfik	Aalisarneq aalisakkanillu tunisassiorneq niuernerlu
10.20.10	-	Nioqqutissiorfik	Aalisarneq aalisakkanillu tunisassiorneq niuernerlu
10.20.20	-	Nioqqutissiorfik	Aalisarneq aalisakkanillu tunisassiorneq niuernerlu
46.38.10	-	Niuertunik pilersuineq atugassanillu nioqquteqarneq	Aalisarneq aalisakkanillu tunisassiorneq niuernerlu
71.12.40	-	Namminersortunit, ilisimatusarnikkut teknikkikkullu suliaqartunit kiffartuussinerit	Aatsitassarsiorneq
-	18534975 Neqi	Nioqqutissiorfik	Nunalerineq, orpippassualerineq nunalerinermilu niuerneq
-	25025490 Isortumi Tuttuuteqarfik	Nioqqutissiorfik	Nunalerineq, orpippassualerineq nunalerinermilu niuerneq

 

Innuttaasunut nalunaarsuiffik

Innuttaasut najugaqavissut kisitsisini misissueqqissaarnermi tunngavigineqartut annertussusaat Naatsorsueqqissaartarfiup inunnik nalunaarsuisarfia atorlugu killilerneqarput. Nalunaarsuisarfik aamma nunat sumiiffiini suliffillit pillugit paasissutissanut atassusiinermi atorneqarpoq – soorlu najukkanut, ukiunut aamma suiaassutsinut. Ukiup naanerani sumiiffinni paasissutissat naatsorsorneqarput.

 

Ilinniartunut nalunaarsuiffik

Kisitsisini ilinniagaqarsimanermut paasissutissanut Naatsorsueqqissaartarfiup ilinniakkanut qaffasinnerpaatut naammassisimasanut nalunaarsuutai (HFU), ukiup naanerani naatsorsorneqartut atorneqarput. Ilinniakkat immikkoortiternerini ISCED11-mi ilinniakkanut taaguutit malillugit, ilinniagaqarfiit qaffasissusaannut assigiinngitsunut tallimanut Meeqqat atuarfiat appasinnerpaatillugu Ingerlariaqqiffiusumillu ilinniarneq qaffasinnerpaatillugu immikkoortiterneqarput. Taamatuttaaq inuussutissarsiornermik ilinniakkat iluanni ilinniagaqarfinnut arfineq-marlunnut agguataaraluni immikkoortiterisoqarpoq. Ilinniartitaaneq ilinniagaqarfiillu pillugit annertunerusumik paasisaqarusuttunut innuttaasut ilinniagaqarsimassusaat pillugu saqqummersitami kingullermi periaatsimut immikkoortoq innersuussutigineqarpoq.