3. Najoqqutat

Suliffeqarnermi kisitsisitigut paasissutissat najoqqutat assigiinngitsut suliaralugit nalunaarsuisarfimmut Kalaallit Nunaanni suliffeqarnermut paasissutissanik matussusiisunik ataatsimoortitsilluni suliarineqartarput. Immikkoortumi matumani kisitsisini najoqqutarineqartut ataasiakkaat nassuiarneqarput.

 

Qaammammut nalunaarsuutit nassuiaataat

Suliffeqarnermut kisitsisitigut paasissutissani najoqqutarineqartut tassaapput qaammatikkaartumik nalunaarsuutit, sulisitsisunit Akileraartarnermut Aqutsisoqarfimmut nalunaarusiarineqartartut. Qaammatikkaartumik nalunaarsuutit suliffeqarfinni sulisunut ataasiakkaanut akissarsianut akileraarutinullu agguataarneqartarput.

 

Inuit isertitaannut nalunaarsuisarfik

Qulaani najoqqutani pineqartuni suliffilinnut tamakkiisumik matussusiinngillat. Ilaatigut namminersorlutik inuussutissarsiutinik ingerlatsisut ilaanngillat. 2015 sioqqullugu qaammammut nalunaarsuutaasartuni aamma sulisut Danmarkimi nalunaarsorneqarsimasumik sulisitsisullit ilaanngillat. Suliffillit, qaammatikkaartumik nalunaarsuiffinni ilaanngitsut, Naatsorsueqqissaartarfiup isertitanut nalunaarsuiffianit, Akileraartarnermut Aqutsisoqarfimmut ukiumoortumik nammineq nalunaarsuiffinnik tunngaveqartumit, pineqartut isertitaannit A-nit, tunisinerannit, namminerisamillu suliffeqarfiutaannit paasissutissat atorlugit ilanngunneqartarput.

 

Isertitanut taarsiissutaasunik kommuninit ikiorsiissutit

Pisortat akissarsialeriffiat atorlugu kommunit isertitanut taarsiissutaasunik ikiorsiissutaat nassaarineqarsinnaapput. Ikiorsiissutillu tassaapput utoqqalinermi soraarnerussutisiat, siusinaartumik soraarnerussutisiat, atorfilittut sulisimanermi soraarnerussutisiat kiisalu suliffeqanngikkallarnermi ikiorsiissutit. Ikiorsiissutit pineqartut qaammatikkaartumik nalunaarusiani piiarneqarput.

 

Qitiusumik Suliffeqarfinnik Nalunaarsuiffik

Qitiusumik Suliffeqarfinnik Nalunaarsuiffik (CVR) atorlugu suliffeqarfiit ataasiakkaat inuussutissarsiorfinni paasissutissaat aaneqarput, taamaasilluni suliffillit inuussutissarsiutinut immikkoortiterneqarsinnaalerlutik. CVR-imi suliffeqarfiit nalunaarsorsimasut tamarmik suliaat pingaarnerit malillugit suliaqarfinnut inissitsiterneqartarput. Suliaqarfiillu paasissutissaat Dansk Branche-nomenklatur (DB07) malillugu immikkoortiterneqartarput.

 

Suliffeqarnermi kisitsit paasissutissaanni suliaqarfiit agguataarnerat annikitsumik naleqqussarneqarpoq. Kisitsisini inuussutissarsiorfiup annerpaap CVR-imi suliaqarfiit agguataarneqarnerat naleqqatiginngimmagu. Naleqqussaanermi peqqutaavoq suliffeqarfiit annerit – pingaartumik aalisarnermut, toqqaannartumik toqqaannanngitsumilluunniit aalisarnerup iluani attuumassuteqartut – CVR-imi suliaqarfinni allani nalunaarsorsimanerat. Tamanna – naleqqussaasoqartinnagu – suliaqarfinni ataasiakkaani suliffillit – pingaartumik aalisarnerup iluani – annikippallaarnerannik kinguneqarsinnaavoq, suliaqarfinnilu allani – pingaartumik niuernermi suliffissuaqarnermilu – killormut suliffillit annertuallaalernerannik kinguneqarsinnaalluni.

 

Suliaqarfinnut naleqqussaanermi suliffeqarfiit ataasiakkaat suliaqarfiat malillugu allanut inissinneqarput. Inuussutissarsiorfillu Aalisarneq aalisakkanillu tunisassiorneq niuernerlu, aalisartut saniatigut aamma suliffeqarfinnik aalisakkanik piareersaanermik, niuernermik nioqqutissiornermillu suliaqartunik ilaneqarpoq. Taamatuttaaq inuussutissarsiorfik Nunalerineq, orpippassualerineq nunalerinermilu tunisassiorneq, suliffeqarfinnik nersutaatinik toqoraanermik suliaqartunik ilaneqarpoq. Inuussutissarsiorfik Aatsitassarsiorneq, suliffeqarfiit aatsitassarsiornermik ingerlatsisut saniatigut aamma suliffeqarfinnik aatsitassarsiornermut toqqaannartumik atassuteqartunik, assersuutigalugu aatsitassanik misissuinernik suliaqartunik ilaneqarluni.

 

Eqqortumik oqaatigalugu suliaqarfinnik naleqqussaaneq suliffeqarfiit suliaqarfinni ilisarnaataat (DB07) imaluunniit CVR-normui malillugit ingerlanneqarpoq.

 

Suliaqarfinnik naleqqussaaneq, inuussutissarsiorfinnut nutaanut immikkoortiterinerit

DB07 suliaqarfiup ilisarnaataa	CVR-normu Suliffeqarfik	Inuussutissarsiorfimmiit	Inuussutissarsiorfimmut
10.11.90	-	Nioqqutissiorfik	Aalisarneq aalisakkanillu tunisassiorneq niuernerlu
10.20.10	-	Nioqqutissiorfik	Aalisarneq aalisakkanillu tunisassiorneq niuernerlu
10.20.20	-	Nioqqutissiorfik	Aalisarneq aalisakkanillu tunisassiorneq niuernerlu
46.38.10	-	Niuertunik pilersuineq atungassanillu nioqquteqarneq	Aalisarneq aalisakkanillu tunisassiorneq niuernerlu
71.12.40	-	Namminersortunit, ilisimatusarnikkut teknikkikkullu suliaqartunit kiffartuussinerit	Aatsitassarsiorneq
-	18534975 Neqi	Nioqqutissiorfik	Nunalerineq, orpippassualerineq nunalerinermilu niuerneq
-	25025490 Isortumi Tuttuuteqarfik	Nioqqutissiorfik	Nunalerineq, orpippassualerineq nunalerinermilu niuerneq

 

Innuttaasunut nalunaarsuiffik

Innuttaasut najugaqavissut kisitsisini misissueqqissaarnermi tunngavigineqartut annertussusaat Naatsorsueqqissaartarfiup inunnik nalunaarsuisarfia atorlugu killilerneqarput. Nalunaarsuisarfik aamma nunat sumiiffiini suliffillit pillugit paasissutissanut atassusiinermi atorneqarpoq – soorlu najukkanut, ukiunut aamma suiaassutsinut. Ukiup naanerani sumiiffinni paasissutissat naatsorsorneqarput. Ukioqqortussutsillu qaammatip kingulliup tulliani naatsorsorneqarput, taamaasilluni soraarnerussutisiaqalernissamut ukiorititat eqqortumik kisinneqarlutik.

 

Ilinniartunut nalunaarsuiffik

Kisitsisini ilinniagaqarsimanermut paasissutissanut Naatsorsueqqissaartarfiup ilinniakkanut qaffasinnerpaatut naammassisimasanut nalunaarsuutai (HFU), ukiup naanerani naatsorsorneqartut atorneqarput. Ilinniakkat immikkoortiternerini ISCED11-mi ilinniakkanut taaguutit malillugit, ilinniagaqarfiit qaffasissusaannut assigiinngitsunut tallimanut Meeqqat atuarfiat appasinnerpaatillugu Ingerlariaqqiffiusumillu ilinniarneq qaffasinnerpaatillugu immikkoortiterneqarput. Taamatuttaaq inuussutissarsiornermik ilinniakkat iluanni ilinniagaqarfinnut arfineq-marlunnut agguataaraluni immikkoortiterisoqarpoq. Ilinniartitaaneq ilinniagaqarfiillu pillugit annertunerusumik paasisaqarusuttunut innuttaasut ilinniagaqarsimassusaat pillugu saqqummersitami kingullermi periaatsimut immikkoortoq innersuussutigineqarpoq.

 

Ernereernermi sulinngiffeqarneq

Ernereernermi ullormusiallit pisortat akissarsialeriffiannit aaneqarput. Erninissaq sioqqullugu qaammatini pingasuni suliffilik qaammatikkaartumik nalunaarusiani isertitaqarnerpaasarpoq. Ernereernermilu sulinngiffeqarnermi suliffeqarneq suliaqarfimmi pineqartumi naatsorsorneqarpoq.