Nalinginnaasumik
Tunisat amerlassusaat ataatsimut isigalugu 2020-mi 2019-imut naleqqiullugu 4 pct.-nik ikileriarput. Tunisat nalingi piffissami tassani 12 pct.-nik appariarput.
Qalerallit
2020-mi qalerallit tunisat ukiup siulianut naleqqiullugu 14 pct.-nik ikileriarput. Tunisat piffissami tassani nalingi aamma assinganik appariarput.
Nipisaat
Nipisaat tunisat 2020-mi ukiup siulianut naleqqiullugu 20 pct.-nik amerleriarput. Tunisat nalingi ukiup siulianut sanilliullugu 8 pct.-nik qaffariarput. 8.883 tonsit nipisaat assigaat suaat 1.326 tonsit missaat, tassa suanniit nipisannut uuttuut 6,7-iutinneqartarami.
Saarulliit
Saarulliit tunisat 2019-imi 24.158 tonsiusimasut 2020-imi 20.187 tonsinut ikileriarput. Ikileriaat 16 pct-iulluni. Tunisat nalingi 30 pct.-inik piffissami tassani appariarput.
Kinguppaat
2019-imi kinguppaat tunisat 51.272 tonsiniit 2020-mi 54.454 tonsinut amerleriarput. Amerleriaat 6 procentiulluni. Tunisat nalingi piffissami tassani 3 pct.-nik appariarput.
Saattuat
Saattuanik tunisineq 2019-imi 2.803 tonsiniit 2020-mi 2.511 tonsinut appariarpoq. Ikileriaat 10 pct.-ulluni. Piffissami tassani tunisat nalingi 22 pct.-nik appariarput.
Nunatta imartaani
Avataasiorluni nunatta eqqaani nammineq tunisassiuutigalugu aalisarnermi pisat 2020-mi 2019-imut naleqqiullugit 10 pct.-nik amerleriarput. Pisat nalingi piffissami tassani 8 pct.-nik qaffariarput.
Imartat allat
Imartani allani aalisarnermi 2020-mi pisat ukiup siulianut naleqqiullugu 5 pct.-nik ikileriarput. Pisat nalingi piffissami tassani aamma taamak appariar-put.
Aalisariutinut tunngasut tunisallu nalingi
Aalisariutit qassiuneri kommuninut agguarlugit tabelini takuneqarsinnaapput (tabeli 11 aamma 12), tassani angallatit aalisariutit, umiatsiat, qimussit aammalu qamuteralaat, minnerpaamik ataatsimik aalisarsinnaanermut akuersissummik pigisaqartut minnerpaammillu ataasiarlutik 2020-mi pisanik tunisaqarsimasut kisinneqarsimapput. Angallatit aalisariutit angissutsinut, sananeqaatsinut, aalisariaatsinut kommuninullu agguataarsimapput.
Tabeli 12-imi angallatit 2020-imi pisoqaassusaat takutinniarneqarpoq.
Tabeli 13-imi tunisat decilinut aggorlugit takutinneqarput.
Tabeli 14-imi angallatinut aalisariutit angissuseqatigiit pingasunut umiatsianullu tunisat nalingi, qaleralinnut aalisakkanullu tamanut takutinniarneqarput.