Siulequt
Kalaallit Nunaanni Naatsorsueqqissaartarfiup 2021-mut ukiumoortumik nalunaarusiaa saqqummiunneqarpoq. Naatsorsueqqissaartarfiup suliassai, tassunga ilanngullugit suliffeqarfiup inatsisitigut tunngavigisai aqutsinermilu pissutsit nalunaarusiami allaaserineqarput. Tamatuma saniatigut Naatsorsueqqissaartarfimmi 2021-mi kisitsisitigut paasissutissat suliarineqartut kiisalu suliffeqarfiup aningaasaqarnera, sulisullu pillugit takussutissat nalunaarusiap imarai.
Ukiumoortumik nalunaarusiamut atatillugu ingerlatsinermi pilersaarut siulersuisut akuerisimasaat ukiumut ataasiarluni nutarterlugu saqqummersinneqassaaq.
Covid-19 pissutaalluni saqqummersitassat allanngunngillat. Nappaassuarli pissutaalluni suliat ineriartortinnerat sivisunerusumik pivoq.
2021-mi angusat ataatsimut isigalugit naammaginarput. Ukiut siuliinut sanilliullugu atuisunut pitsanngoriaatit arlaqartut ukiumoortumik nalunaarusiamut ilanngunneqarput. Saqqummersitat aamma kisitsisaataasivimmi tabelit amerlipput. Taakku saniatigut kisitsisitigut paasissutissiat assigiinngitsut pitsanngorsarneqarput, atuisut tamanna ukiut arlalialuit qaangiuppata malugiumaarpaat.
Vøgg Løwe Nielsen
Siulersuisunut siulittaasoq