Saqqummersitami matumani siunertaavoq Kalaallit Nunaata nunanik allanik niueqateqarnera pillugu naatsumik ersarissumillu takutitassiinissaq. Nunanut allanut niuerneq pillugu kisitsisitigut paasissutissat itinerusumik Kalaallit Nunaata nunanik allanik niueqateqarneranik allaaserinninneruvoq. Kisitsisitigut paasissutissat, saqqummersitsinermut tunngaviusut, nunani tamalaani najoqqutarineqartut malillugit suliaapput, Nioqqutinik immikkoortiterineq takuuk.
Nalileeriaatsimi periutsimik allannguineq
Kiilumut akit qaffasinnerusut
Nunanut allanut niuerneq pillugu kisitsisitigut paasissutissani 2019-imi 1. kvartalimit, aalisakkat tunisat nalingi akiilu qaffasissutsimut qaffasinnerusumut nikipput. Tassunga pissutaavoq aalisakkanik avammut tunisisartut akitsuuserisunut nalunaarsuisarnerminnik allannguisimanerat. Periutsimik allannguineq pissutaalluni, nunanut allanut tunisinermi nalip nuna tamakkerlugu naatsorsuutini saqqummiunneqarsimasuni nalimut assingunerulerpoq. Nuna tamakkerlugu naatsorsuutini piginnittup nikinnerani aalisakkap nalinga atorneqartarpoq, nunanut allanut niuernermi nunap killingani aalisakkap nalinga atorneqartartoq.
Maannamut kiilumut akit
Aalisakkat nunap killinga qaangeraangassuk, kalaallit avammut tunisisartut assigiiaartumik akilersuinermi periuseqartarsimanngillat. Taamaaliorneq inatsisit malillugit pisarpoq aamma avammut tunisisartut ilaat Danmarkimi quersuaqartiternerinik attuumassuteqarpoq, avammut tunisat ilaat quersuarnut assartorneqartarput tunineqannginnerminni tassaniitinneqartarlutik. Danmarkimi quersuarniititsinermi akiligassamik nassitsisoqartarpoq suliffeqarfiup akigititai atorlugit. Suliffeqarfiit akigititaat Namminersorlutik Oqartussat Aalborgimi akitsuuserisuinut nassiunneqartartut atorlugit avammut tunisinermut nalitut nunanut allanut niuernermut kisitsisitigut paasissutissanut maannamut atorneqartarpoq.
Kingusinnerusukkut avammut tunisisartut Danmarkimiititaminnik tunisigaangamik Kalaallit Nunaanni Akileraartarnermut Aqutsisoqarfimmut nalunaartarput. Akileraartarnermut Aqutsisoqarfimmut nalunaarnerit aalisarnermut akitsuutinik naatsorsuinermi atorneqartarput. Akitsuuserisunut nunap killingata qaangerneranik nalunaarutit, aalisarnermut akitsuutit annertussusaanut sunniuteqanngillat.
Kinguneri
Qulaani taaneqartut allannguinerit pissutaallutik 2019-imi nunanut allanut tunisinermi nalit aamma agguaqatigiissillugu akit, ukiut siuliini nalinut aamma agguaqatigiissillugu akinut sanilliunneqarsinnaanngillat. Tamatuma sunniutaa erseqqissarniarlugu Naatsorsueqqissaartarfimmit titartagaq 1 suliarineqarpoq. Titartakkami tassani takuneqarsinnaavoq 2015-2019-imi avammut tunisat nalingi ataatsimoortillugit 2019-imi naatsorsueriaaseq atorneqalersoq atorlugu missingersukkat.
30 pct. missaanik qaffaaneq
Titartakkami takuneqarsinnaavoq nalunaarsuinermut periuseq nutaaq atorlugu avammut tunisat nalingi 30 pct.-it missaanik ukiut tamaasa qaffasinnerusartut. Tamanna pissutaalluni 2019-imi avammut tunisat nalingi ukiuni siusinnerusuni avammut tunisat nalinginut imaaliallaannarluni sanilliunneqarsinnaanngillat.
Eqqussukkat pillugit nalunaarsueriaaseq allanngunngilaq.
Titartagaq 1. Avammut tunisinermi nalunaarsueriaatsip nutaap kinguneri
