Aalisariutaatigineqartut

Kalaallit Nunaanni aalisariutit 1960-ikkunni amerliartortinneqalerput. 2006-mi aalisariutit 863-iupput. Taakku saniatigut 3.000 aamma 5.000-it akornanni umiatsiaaraqarpoq, taakkunannga ilaat aalisarnermut piniarnermullu atorneqarlutik ilaallu aalisariutinut bundgarnersortunullu assigisaannullu attuumassuteqarlutik.

Aalisariutit avataasiortut aalisariutinik 75 BRT/120 BT sinnerlugu angissusilinnik ilaqarput killeqarfiup 3 sømilit avataani aalisartunik. 2006-imi aalisariutit avataasiutit 71-it 81 BRT sinnerlugu angissuseqarput, takuuk Tabel 6. Soorlu Tabel 6-mi takuneqarsinnaasoq avataasiorlutik aalisariutit Kalaallit Nunaata Qeqqani eqiterussimanerupput.

Sinerissap qanittuani aalisariutit 75 BRT/120 BT-inik mikinerupput, taakkulu killeqarfiup 3 sømilit iluanni aalisarput. Aalisariutit 10 BRT-inik mikinerusut Avannaani amerlanerupput, tamaani pingaarnermik qaleralinniartuullutik.

Aalisariutit namminersortunit pigineqarput. Kilisaatit Royal Greenland A/S-imit pigineqartut toqqaannanngitsumik pisortanit pigineqarput, tassa Royal Greenland 100 pct.-imik Namminersornerullutik Oqartussanit pigineqarmat. Sinerissap qanittuani aalisariutit ilarpassui ESU aqqutigalugu aningaasalersorneqarput (ESU-mit taarsigassarsinikkut)

Avataasiorlutik aalisariutit nunat allamiut taarsigassarsiniartarfiannit (skibskreditordninger) assigisaanniillu aningaasalersorneqarput. Siornatigut avataasiorlutik aalisariutit amerlisarneqarnerat Nunatta Karsianit qularnaveeqqusiinikkut aningaasalersorneqarput, tamannali periuseq taamaatinneqareerpoq.