Akileraarusersueriaaseq

Kalaallit Nunaanni isertitatigut akileraarutit taamaallaat tassaapput toqqaannartumik akileraarutit, tassa pigisat nalillit, illuutit akileraaruserneqarneq ajormata kingornussinermulluunniit akitsuuteqanngimmat.

 

Kinaluunniit tamakkiisumik akileraartussaavoq, pineqartoq Kalaallit Nunaanni aalajangersimasumik najugaqaruni imaluunniit Kalaallit Nunaanni sivikinnerpaamik qaammatini arfinilinni najugaqarsimaguni.

 

Isertitat akileraaruteqaataasussat tassaapput ukiumut isertitat tamarmik akileraarusiinermi ilanngaatit nalinginnaasumilluunniit ilanngaatit ilanngaatigalugit.

 

Akileraarusiinermi ilanngaatit tassaapput ernianut aningaasartuutit, suliatigut kattuffinnut ilaasortaanermut akiliutit, meeqqanut akilersuutit il.il. kiisalu nammineq inuussutissarsiuteqarnermut atasumik aningaasartuutit. Akileraarusiinermi ilanngaatit nalinginnaasumik ilanngaammit amerlaneruppata, nalinginnaasumik ilanngaat atorunnaassaaq. Kiisalu inummut ilanngaat ilanngaatigineqartarluni.

 

Kommunimut akileraarutit kommuninit ataasiakkaanit annertussusilerneqartarpoq. Sumiiffinni kommunit agguataarneqarnerisa avataaniittuni kommunimut akileraarut akilerneqarneq ajorpoq, kisiannili nuna tamakkerlugu immikkut akileraarut akilerneqartarluni, Inatsisartunit aalajangersarneqartartoq.

 

Suliffeqarfiit akileraarusersorneqarnerannut suliffeqarfiit 30 pct.-imik akiliuteqartarput. Aktiaateqarluni aamma piginneqataassuteqarluni ingerlatseqatigiiffiit tamatuma saniatigut pissarsianit akileraarutinik akiliisarput kommunimut akileraarutinut atuuttunut naapertuuttumik akiliisarlutik. Ingerlatseqatigiiffinnit pissarsianillu akileraarutit Nunatta Karsiata kommunillu akornanni akileraartitsinermut pct.-it tunngavigalugit agguataarneqartarput.