Suliffissaaleqineq pillugu kisitsisitigut paasissutissanut nassuiaateqarneq naatsunnguaq
Kommunit qaammammut ataasiarlutik suliffissarsiortutut nalunaarsimasunik nalunaarsuisarnerat aamma Naatsorsueqqissaartarfiup sulinernik allattuiffia tunngavigalugit suliffissaaleqisut pillugit kisitsisitigut paasissutissiortoqartarpoq. Sulinerit pillugit kisitsisitigut paasissutissat assigalugit nunani tamalaani ILO-mik, tassa sulisartunut aaqqissuussisimanermi nassuiaatigineqartut malillugit suliffissaaleqineq pillugu kisitsisitigut paasissutissat suliarineqartarput. ILO-mik tunngaveqarluni suliarinerup kinguerivaa paasissutissat nunani allani kisitsisinut sanillunneqarsinnaalernerat. ILO-mi suliffissaaleqisup nalunaarsuinermi suliffeqarsimannginnissaa piumasaqaatigineqartut pingaarnerit ilagivaat. Suliffissaaleqisut qaammammi nalunaarsuiffiusumi suliffeqarsimasutut nalunaarsukkanut ilanngunneqarneq ajorput. Suliffissaaleqineq pillugu paasissutissani taamaallaat inuit ukiup naatsorsuiffiup aallartinnerani naaneranilu Kalaallit Nunaanni najugaqarsimasut paasissutissanut ilanngunneqartarput.
Suliffissaaleqineq pillugu kisitsisitigut paasissutissat Naatsorsueqqissaartarfimmit ukiumut ataasiarlutik saqqummersinneqartarput, taakku saniatigut qaammatit tamaasa suliffissarsiortutut nalunaarsukkat saqqummersinneqartarput. Saqqummersitat taakku suliffissaaleqineq pillugu kisitsisitigut paasissutissatut isigineqassanngillat tassa suliffissaaleqisut piffissami tassanerpiaq qanoq inissisimanerannik taamallaat takutitsisuusarmata, naatsorsuutini suliffeqannginnermut piumasaqaataasut tunuliaqutarineqarneq ajorput. Allaasarisani tulliuttuni ukiumut suliffissaaleqinermik kisitsisitigut nalunaarusiaq taamaallaat sammineqarpoq.
Najugaqavissut akornanni suliffissaaleqineq
Titartakkami 5.1-imi suliffissaaleqinermut piffissaq apeqqutaasartoq takuneqarsinnaavoq, ukiukkut suliffissaaleqisut amerlanerusarput aasamilu ikinnerusarlutik. Sulineq pillugu kisitsisit killormoortut takutippaat, tassa ukiup ingerlanerani sulisut nikerannginnerusaramik.
Titartagaq 5.1. Suliffissaaleqisut agguaqatigiissillugu qaammammut amerlassusaat kvartalinut immikkoortiterlugit
Najoqqutaq: Kisitsisaataasivik. http://bank.stat.gl/ARNLED4
Nunap immikkoortortaqarfiini suliffissaaleqisut amerlassusaasa assigiinngisitaarnerujussuaq titartakkami 5.2-mi takuneqarsinnaavoq. Sisimiuni Kalaallit Nunaanni suliffissaaleqisut ikinnerpaajupput, tassani innuttaasut 7,6 procentisa missaat suliffissaaleqisuupput. Kangaatsiami, Qaanaami, Ittoqqortoormiini aamma Tasiilami suliffissaaleqisut amerlanerpaajupput, taakkunani suliffissaaleqisut innuttaasut 20 procentisa missaanit aallartipput. 2014-imi qaammammut agguaqatigiissillugu nuna tamakkerlugu innuttaasut 10,3 procentii suliffissaaleqisuusimapput.
Titartagaq 5.2. 2014-imi nunap immikkoortortaqarfiini qaammammut agguaqatigiissillugu suliffissaaleqisut amerlassussat
Najoqqutaq: Kisitsisaataasivik. http://bank.stat.gl/ARNLED4
2014-imi sivikinnerpaamik qaammat ataaseq suliffissaaleqisimasut 7.924-iusimasut tabel 7-imi takuneqarsinnaavoq. Agguaqatigiissillugu qaammammut suliffissaaleqisartut pingaseriaatigingajappaat. 2014-imi suliffissaaleqisimasut affaat sinnerlugit sivisunerpaamik qaammatit pingasut suliffissaaleqisimasut, suliffissaaleqisut 10 procentii ataallugit qaammatini qulini aqqaneq marlullu akornanni sivisussusilimmi suliffissarsiortuusimapput.
Titartakkami 5.3-mi inuusuttut nunaqarfinni suliffissaaleqisut ukioqqortunerusunut sanilliullugu amerlanerusut takuneqarsinnaavoq.
Illoqarfinni 18-19-inillu ukiulit akornanni 22,3 procentit suliffissaaleqisuupput nunaqarfinni taamatut ukiullit 30,0 procentii suliffissaaleqisut, illoqarfinni nunaqarfinnilu suliffissaaleqisut ukioqqortusiartortillutik 35-t missaanik ukiullit tikillugit ikiliartorput. Titartakkami aamma takuneqarsinnaavoq nunaqarfinni suliffissaaleqisut illoqarfinni suliffissaaleqisut ukiui apeqqutaannatik, 50-54-inik ukiullit kisiisa minillugit suliffissaaleqisunit amerlanerusut. 50-54-inik ukiullit nunaqarfinni suliffissaaleqisut illoqarfinni suliffissaaleqisunit ikinnerluaarput.
Titartagaq 5.3. 2014-imi illoqarfinni nunaqarfinnilu qaammammut agguaqatigiissillugu suliffissaaleqisut amerlassussaat
Najoqqutaq: Kisitsisaataasivik. http://bank.stat.gl/ARNLED4
Titartakkami 5.4-mi nunami tamarmi arnat angutillu suliffissaqanngitsut 2014-imi assigiimmik inissisimapput. Tamannali illoqarfinni arnat suliffissaaleqisut ikinnerusimanerannik akerlianillu nunaqarfinni arnat suliffissaaleqisut amerlasimanerannik pissuteqarpoq. Angutit suliffissaaleqisut illoqarfinni nunaqarfinnilu assigiiginnangajapput.
Titartagaq 5.4. 2014-imi illoqarfinni nunaqarfinnilu arnat angutillu suliffissaaleqisut
Najoqqutaq: Kisitsisaataasivik. http://bank.stat.gl/ARNLED4
Suliffissaaleqisut amerlanerpaartaat, 83 procentiisa missaat meeqqat atuarfianni atuareerlutik ilinniagaqaqqissimanngitsut titartakkami 5.5-mi takuneqarsinnaavoq. Ukiuni kingullerni ilinniarsimanngitsut suliffissaaleqisut amerliartorsimapput. 2014-imi sulisinnaasut akornanni suliffissaaleqisut meeqqat atuarfianni ilinniareerlutik ilinniagaqaqqissimanngitsut 15,5 procentiusimapput. 2010-miit 2014-imut suliffissaaleqisut ilinniarsimassuaat tunngavigalugit immikkoortillugit tabel 11-mi takuneqarsinnaapput.
Suliffissaaleqisut ilinniagaqarsimasut procentinngorlugit agguataarneranni nuna tamakkerlugu suliffissaaleqisunut 10,3 procentiusumut sanilliullugu appasinneruvoq. Qaffasissumik ilinniarsimasut akornanni suliffissaaleqineq appasittorujussuuvoq 0,8 procentiusimagami.
Titartagaq 5.5. 2014-imi suliffissaaleqisut procentinngorlugit ilinniarsimassusaat tunngavigalugu immikkoortillugit
Najoqqutaq: Kisitsisaataasivik. http://bank.stat.gl/ARNLED7
Qaffasinnerpaamik inuussutissarsiummik ilinniagaqarsimasut akornanni suliffissaaleqisut inissisimanerat assigiinngiilaq. Kiffartuussinermik ilinniagaqarsimasut (assersuutigalugu terminalini sulisut aamma igasut) 2014-imi suliffissaaleqisut 8,5 procentiusimapput Nunalerinermik, orpipassualerinermik, aalisarnermik nerisassanillu ilisimatusarnermik ilinniagaqarsimasut (assersuutigalugu aalisartut aamma qalulerisut) 10, 0 procentit suliffissaaleqisussimapput. Akerlianik allaffissornermik inatsisilerinermik ilinniagaqarsimasut (assersuutigalugu HK-assistentit aamma pisiniarfinni sulisut) suliffissaaleqisut 2014-imi 4,3 procentiusimapput ikitsuaraasimallutik Allamik ilinniagaqarsimasut suliffissaaleqisut (assersuutigalugu IT-mik suliaqartut) 2014-imi 2,6 procentiusimapput.
Titartagaq 5.6. 2014-imi suliffissaaleqisut ilinniarsimassusaat tunngavigalugit procentinngorlugit
Najoqqutaq: Kisitsisaataasivik. http://bank.stat.gl/ARNLED7