Aallaqqaasiut
Saqqummersitami matumani ukiuni 2017-imiit 2020-mut qaammat decembarimi utoqqalinermi aammalu siusinaarluni soraarnerussutisiallit amerlassusaat naatsorsorneqarput.
Saqqummersitap
ilusilersornera
Immikkoortut aappaanni utoqqalinermi siusinaarlunilu soraarnerussutisiallit pillugit kisitsisit pingaarnersiorneqarput, inatsisitigullu tunngaviit ersarissarneqarlutik.
Kapitali
3-mi soraarnerussutisiallit suiaassusiinut, ukioqqortussusaanut
najugaqarfiinullu immikkoortiterneqarlutik suliarineqarput. Tassani aamma
takuneqarsinnaapput soraarnerussutisiallit kisimiittuunersut imaluunniit
aappaqarnersut aamma soraarnerussutisiallit utoqqaat illuanni
najugaqartuunersut imaluunniit ulloq unnuarlu paaqqinnittarfinni allani najugaqarnersut.
Kapitali
4-rimi allaaserineqarput ukiup siulianut naleqqiullugit
soraarnerussutisiaqalersut aamma soraarnerussutisiaaruttut
Kapitali
5-imi utoqqalinermi soraarnerussutisiallit tunngaviusumik soraarnerussutisiaat
aamma tapisiaat.
Kapitali
6-imi inatsit tunngaviusoq aammalu pisortanit soraarnerussutisiaqalernissamut
piumasaqaatit pingaarnersiorneqarput. Januaarip aallaqqaataat 2016
aallarnerfigalugu utoqqalinermi soraarnerussutisiat allanngorput.
Allannguummilu pingaarnerpaaq tassaavoq aapparisap isertitaanut
attuumassuteqanngitsumik, namminerli saniatigooralugu akissarsiarisimasat
tunngavigalugit aningaasat tunngaviusut annertussusissaannik atuutsitsilerneq.
Juulip
aallaqqaataani 2016-imi siusinaarluni soraarnerussutisianut aaqqissuusseqqinneq
atuutilerpoq. Siusinaarluni soraarnerussutisiallit inuussutissarsiornermi
pisinnaasaat ukiut tallimakkaarlugit nalilersorneqartassapput.
Soraarnerussutisiat inuussutissarsiornermi piginnaasat malillugit
tunniunneqartassapput, akinullu qaffasinnerpaanut, akunnattunut
appasinnerpaanullu immikkoortitigaallutik.
Januaarip
aallaqqaataat 2017 aallarnerfigalugu utoqqalinermi
soraarnerussutisiaqarnissamut ukiut killigititat 65-imiit 66-inut
qaffanneqarput.
Tamanna
kisitsisitigut paasissutissani ukiunut nalunaarsuutaasartut 2011-miit 2016-imut
65-imiit 69-imut nalunaarsorneqartarsimasut aammalu 2017-imi 2018-imilu
66-imiit 69-imut nalunaarsorneqartarsimasut “70-it inorlugit ukiullit”-nik
taaneqarnerannik kinguneqarpoq.
Taamatuttaaq
siusinaartumik soraarnerussutisialinnut nalunaarsuutit 2017-imi taamaallaat
65-inik ukiulinnik imaqarsimasut massakkut “65 +”-inik ilaneqarput.
Kisitsisitigut
paasissutissat kommunit soraarnerussutisianut naatsorsuuserisarfiinit
Naatsorsueqqissaartarfiullu inunnut nalunaarsuiffianit nalunaarsuutit
tunngavigalugit pilersinneqarput. Kapitalit 7-ianni nalunaarsuutit tunngaviusut
taakkulu suliarineri kiisalu periaaseq nassuiarneqarput.