Periaaseq

Naatsorsueqqissaartarfiup ilinniartitaanermut kisitsisitigut paasissutissanik naatsorsuisarnera siunissami taamaallaat UNESCO’p nunanut tamalaanut malitassiaa ISCED2011 malillugu ingerlasassaaq.

 

Una saqqummersitaq sioqqullugu Naatsorsueqqissaartarfiup ilinniartitaanermut kisitsisitigut paasissutissat piffissami tulliuttumi assigiiaarnerulernissai isumannaarniarlugu iluarsaappai. Misissuineq siornatigut kisitsisinik saqqummiunneqarsimasunut sanilliullugu malunnartumik allannguinngilaq.

 

Ukiuni kingullerni pingasuni kisitsisit siunissami kisitsisaagallartuusassapput, siusinnerusukkullu kisitsisit inaarutaasumik kisitsisaasassallutik. Taamaattumik uani saqqummersitami 2012-imit 2015-imut kisitsisit kisitsisaagallartuupput.

 

Nalunaarsuutit

Uani saqqummersitami ilinniartitaanermut kisitsisitigut paasissutissat Ilinniagaqarnersiuteqartitsiviup (USF) allaffissornikkut nalunaarsuutaanik tunngaveqarput. Nalunaarsuutit tunngaviusut naatsorsuutiginnginnerini USF-ip nalunaarsuutai Naatsorsueqqissaartarfimmi naleqquttumik nakkutigineqaqqaarlutik, misissorneqaqqaarlutik aammalu suliareqqinneqaqqaartarput. Pineqartunut nassuiaat www.stat.gl –imi Ilinniartitaanerup ataani nassaarineqarsinnaavoq. Saqqummersitaq kingullerpaaq tooruk kingornalu Periaaseq. Nassuiaat ”2015 USF-imit ilinniartitaanermut nalunaarsuutit misissorneri.pdf”-nik ateqarpoq.

 

Kisitsinermi uuttuutit

Ilinniartitaanermut kisitsisitigut paasissutissani uuttuut Ilinniarnerit kisinneqarpoq. Ilinniarneq ataaseq tassaavoq inuk ilinniartoq ataaseq.

Tamannalu isumaqarpoq ilinniarnerit aammalu inuit amerlassusaat assigiissuseqarpallaanngitsut. Assersuutigalugu ukiumi kisitsiviusumi ataatsimi ilinniartoq ilinniakkamik ataatsimik aallartitsisinnaavoq, unitsitsilluni aammalu ilinniakkami nutaami aallartilluni. Ilinniarnernut inunnullu assigiissummik piffiusinnaasutuaq tassaavoq ilinniarfinni ataasiakkaani ilinniakkanik ingerlatsisunut naatsorsuutit. Una naatsorsuut ukiup naanerni pivoq, ilinniarfimmilu ataasiinnarmi taamaallaat ingerlatsisoqarsinnaavoq. Ilinniartitaanermut kisitsisitigut paasissutissat ukioq kisitsiviusoq atorlugu suliarineqarput. Ukioq ilivitsoq malinneqarpoq ukiullu ingerlanerani pisut kisinneqarnerannik isumaqarpoq, ukiup naanerani piffissamut aalajangersimasumut – soorlu ilinniakkanik ingerlatsisunut – kisitsinerit eqqaassanngikkaanni.

 

ISCED2011

Nunarsuarmi sumiiffinni siullerpaat ilaanniilluni massakkut Kalaallit Nunaat UNESCO’p ISCED2011-mut malittarisassaa malillugu ilinniartitaanermut naatsorsuusiorsinnaalerpoq. Ineriartortitsinermut suleqatigiinnerup Naatsorsueqqissaartarfimmit aammalu Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmit peqataaffigineqartup tamanna pisinnaatippaa.

 

Uuttuutit taaguutaat

Naatsorsueqqissaartarfik ilinniartitaanermi uuttuutinut taaguutinik ilinniakkat suut ilinniarfinni pineqartuni imaluunniit ISCED2011-imi immikkoortitersimasuni takuneqarsinnaalersillugit saqqummersitsisimavoq.

Uuttuutit taaguutaat Excel-regneark’iuvoq aammalu www.stat.gl – imi Ilinniartitaanerup ataani nassaarineqarsinnaalluni. Saqqummersitaq kingullerpaaq tooruk kingornalu Periaaseq. Regneark’i “Nomenklatur med ISCED2011 Maj2015.xlsx”.