Eqikkaaneq

Ukiut ingerlanerini, piffissaq 2002 aallarnerfigalugu, innuttaasut ilinniagaqarnerat tamakkiisumik isigalugu neriunartumik ineriartorpoq.

 

2015-ip naanerani innuttaasut 16-it sinnerlugit ukioqartut 36,9 pct.-ii meeqqat atuarfiannit ilinniakkamik qaffasinnerusumik ilinniagaqarsimapput. Taakkunani 11,3 pct.-it ingerlaqqiffiusumik ilinniarsimapput kiisalu 25,6 pct.-it ilinniarnertuunngorniarneq, inuussutissarsiummik ilinniarneq imal. qaffassarluni ilinniarneq qaffasinnerpaamik ilinniagaralugu. Ukiut qulit matuma siornanit 2,0 procentpointinik aamma 4,2 procentpointinik amerlanerupput.

 

Agguaqatigiissinnerini 2015-imi innuttaasut affaannit amerlanerusut 30-niit 40-it aallartilaarlugit ukiullit meeqqat atuarfiannit qaffasinnerusumik ilinniagaqarput. Taakkunannga inuit tallimaagaangata ataaseq ingerlariaqqiffiusumik ilinniagaqarsimasarpoq taamatullu inuit pingasuugaangata ataaseq ilinniarnertuunngorniarfinni, inuussutissarsiornermi ilinniarfinni imaluunniit qaffassarluni pikkorissarnernik ilinniagaqarsimasarluni.