Eqikkaaneq

Ukiut ingerlanerini, piffissaq 2002-miit aallarnerfigalugu, innuttaasut ilinniagaqarnerisa nalunaarsornera tamakkiisumik isigalugu neriunartumik ineriartorpoq.

 

2016-ip naanerani innuttaasut 16-it sinnerlugit ukioqartut 38,2 pct.-ii meeqqat atuarfianni ilinniakkamik qaffasinnerusumik ilinniagaqarsimapput. Taakkunani 12,1 pct.-it ingerlaqqiffiusumik ilinniarsimapput kiisalu 26,1 pct.-it ilinniarnertuunngorniarneq, inuussutissarsiummik ilinniarneq imal. qaffassarluni ilinniarneq qaffasinnerpaamik ilinniagaralugu. Ukiut qulit matuma siornatigut sanilliukkaanni 2,6 procentpoint-inik aamma 4,8 procentpoint-inik amerlanerupput.

 

Agguaqatigiissinnerini 2016-imi innuttaasut affaannit amerlanerusut 30-niit 40-it aallartilaarlugit ukiullit meeqqat atuarfiannit qaffasinnerusumik ilinniagaqarput. Taakku tallimaagaangata ataasingajak ingerlariaqqiffiusumik ilinniagaqartarpoq taamatullu pingasuugaangata ataaseq sinnilaarlugu ilinniarnertuunngorniarfinni, inuussutissarsiornermi ilinniarfinni imaluunniit qaffassarluni pikkorissarnernik ilinniagaqarsimasarpoq.