Siunertaq

Nunatsinni ingerlariaqqiffiusumik ilinniakkat amerlanngillat, taamaattumillu ilinniartorpassuit ilinniassallutik nunanut allanut aallartarput. ’Ilinniakkap naammassereernerata kingorna nuna najugaq’ saqqummersinneqarnerani siunertaavoq ilinniartut nunami allami ilinniakkamik naammassinnereernerup kingorna Kalaallit Nunaannut utertartut annertussusaasa ineriartorneranut malinnaanissaq. Kisitsisitigullu paasissutissat nunatsinni inuussutissarsiornermi imaluunniit ingerlariaqqiffiusumik ilinniakkamik naammassinnissimasunik ilaneqarput.

 

Nalunaarsuutit tunngaviusut

Ilinniakkanut ingerlanneqartunut ilinniakkanillu ingerlatsisunut kisitsisitigut nalunaarsuisarfinnit nalunaarsuutit atorneqarput, kiisalu piffissami 2003-miit ullumikkumut inunnik nalunaarsuisarfimmit nalunaarsuutit. Ingerlariaqqiffiusumik ilinniakkani ilinniaqqiffiit naatsut, bachelorinngorniarnerit/professionsbachelorinngorniarnerit kandidatinngorniarnerillu pineqarput.

 

Periaaseq

Ilinniartut ilinniakkamik naammassinnissimasut nalunaarsuutaat ulloq 31/12 tunngavigalugu nunani allani ilinniakkamik ingerlatsisut nalunaarsuutaannut kiisalu inunnik nalunaarsuisarfimmi ulloq 1/1 nalunaarsuutinut ataatsimoortillugit ingerlatinneqarput.

 

Ukiumi x-imi ilinniakkap naammassereernerata kingorna ukiumi siullermi, inunnik nalunaarsuisarfimmi ukioq x 1-imik ilallugu (+1) naatsorsorneqarpoq, ilinniartunullu ilinniakkamik ingerlatsisunut ukiup x-ip naanera tunngavigalugu naatsorsorneqarluni.

 

Nunamut najukkamut naatsorsuineq:

 

Kalaallit Nunaanni	Inunnik nalunaarsuiffimmi nalunaarsorsimasut nunamili allami ilinniakkamik ingerlatsisutut nalunaarsorsimanngitsut.
Nunami allami	Inunnik nalunaarsuiffimmi nalunaarsorsimanngitsut, ilinniakkamillu ingerlatsisutut nalunaarsorsimanngitsut.
Nunami allami – suli ilinniartut	Nunami allami ilinniakkamik ingerlatsisutut nalunaarsorsimasut.

 

Inunnik nalunaarsuiffimmi nalunaarsorsimanngitsut aamma toqoreersimasinnaapput. Taamaattoqartillugu nunami allami najugalittut kisitsisini ilaatinneqarput.

 

Naatsorsuineq

Ilinniakkap naammassereernerata kingorna nunamut najukkamut kisitsisitigut paasissutissat ilinniakkamik naammassinnereernerup kingorna ukiut 1-10 qaangiunnerini Kalaallit Nunaanni, nunami allami imaluunniit nunami allami ilinniaqqillutik najugalinnik naatsorsuineruvoq. Kisitsisinilu nunami allami aammalu Kalaallit Nunaanni inuussutissarsiornermi ingerlariaqqillunilu ilinniakkanik ingerlatsisut katillugit naatsorsorneqarput.

 

Killiliinerit erseqqissagassallu

Ukiut ataasiakkaat tunngavigalugit sanilliussinermi, ukiut tamaasa nunami allami ilinniakkamik naammassinnittartut amerlannginnerat eqqumaffigineqartariaqarpoq.

 

Inuk ataaseq naatsorsuutini arlaleriarluni ilaasinnaavoq. Assersuutigalugu ilinniartoq 2010-mi bachelorinngorniarnermik naammassinnissimaguni kingornalu 2012-imi kandidatinngorniarnermik naammassinnissimalluni.

 

Siornatigut saqqummersinneqartumi inuussutissarsiornermik ilinniarnermut ilanngunneqartarsimapput “Merx I” aamma “Merx II”. Saqqummersitami manna (21. septembari 2021) aallarnerfigalugu inuussutissarsiornermik ilinniarnermut ilanngunneqassaarput taamaattumik “Merx I”-imik aamma “Merx II”-mik naammassinnittut kisitsisitigut paasissutissanut ilanngunneqassaassapput.