Siunertaq
Kisitsisitigut paasissutissani matumani siunertaavoq ilinniartut qanoq amerlatigisut ilinniakkamik aallartissimasaminnik naammassinnissimanerisa unitsitsisimanerisalu naatsorsorneqarnissaat. Kisitsisitigut paasissutissat siornatigut ilinniakkamik unitsitsisartut paasissutissaannut taarsiissutaapput.
Taamatuttaaq ilinniartut qanoq amerlatigisut ilinniakkap aallartinneraniit ilinniakkap qaffasissusaanik naammassinnissimasut naatsorsorneqarput. Kisitsisinilu paasissutissani matumani ilinniakkap qaffasissusaanni ataatsimi ilinniakkap sammivianik allanngortitsisarneq sillimaffigineqarpoq.
Nalunaarsuutit tunngaviusut
Piffissami 2003-miit ullumikkumut ilinniakkanik aallartitsisunut, ilinniakkanik ingerlatsisunut ilinniakkanillu naammassinnissimasunut nalunaarsuisarfiit tunngavigalugit kisitsisitigut paasissutissat suliarineqarput.
Ilinniartut siullermeerlutik ilinniakkamik aallartitsisut aammalu siullermeerlutik ilinniakkap pineqartup qaffasissusaanik aallartitsisut aallaavigineqarput.
Ilinniakkat
qaffasissusaat International Standard Classification
of Education 2011-meersoq malillugu immikkoortiterneqarput. Naatsorsueqqissaartarfiup
ilinniartitaanerup iluani taaguutit pillugit saqqummersinnikuusaani ilinniakkami
pineqartumi imaluunniit
ISCED-i malillugu immikkoortiterinermi ilinniakkat pineqartut takuneqarsinnaapput. Taassuma saniatigut Naatsorsueqqissaartarfik Kalaallit
Nunaanni ilinniakkat, ilinniakkap qaffasissusaa malillugu, immikkoortiternerat takussutissiaraa. Taaguutit takussutissiarlu www.stat.gl –imi Ilinniartitaanermut tunngasut ataanni nassaarineqarsinnaavoq. Saqqummersitami kingullerpaami Periaatsimut immikkoortoq takuuk.
Kisitsisini
paasissutissani inuussutissarsiornermik
ilinniakkat naatsunut nalinginnaasunullu immikkoortiterneqarput.
Inuussutissarsiornermik ilinniarnerit
sivikinnerit ukiut marluk inorlugit sivisussuseqartut tassaasinnaapput
eqqumiitsuliornermik ilinniarneq,
tapersersuisutut ilinniarneq
portøritullu ilinniarneq. Imarsiornermi ilinniarnerup iluani modulikkaartumik ilinniakkat aamma ilanngunneqarput.
Ingerlariaqqiffiusumik ilinniakkani naatsuni niuernermik ilinniarfimmi
qaffasinnerusumik ilisimatusarnerit,
procesteknikeritullu ilinniarneq
ilanngunneqarput. Bachelorinngorniarnerit
professionsbachelorinngorniarnernut nalinginnaasumillu bachelorinngorniarnernut
immikkoortiterneqarput. Professionsbachelorinngorniarnerit
tassaapput meeqqat atuarfianni ilinniartitsisunngorniarneq,
peqqissaasunngorniarneq tusagassiortunngorniarnerlu,
nalinginnaasumillu bachelorinngorniarnerit
tassaallutik inuiaqatigiilerinermi
ilisimatusarneq, erhvervsøkonomi
iluani ilisimatusarneq aammalu teologi-mik ilisimatusarneq.
Periaaseq
Ilinniakkamik aallartitsisut ukiumi
aallartiffiannit ukiut 1-10
qaangiunnerini ilinniartunut
suli ingerlatsisunut nalunaarsuisarfianni ataatsimut ingerlanneqarput, tulliullugulu ilinniakkanik naammassinnissimasut
nalunaarsuisarfianni ingerlateqqinneqarlutik.
Ukiut tamaasa ukiumi pineqartumi ilinniartut suli ilinniakkamik ingerlatsisutut imaluunniit ukiut kingulliit ilaanni ilinniakkamik naammassinnissimasutut
killiffilerneqartarput. Ilinniartut
suli ilinniakkamik ingerlatsisutut imaluunniit naammassinnissimasutut nalunaarsorneqarsimanngitsut
”unitsitsisimasutut” killiffilerneqarput.
Ilinniartut
ukiumi pineqartumi ilinniakkamik unitsitsisut ukiullu tulliani ilinniagaq aallarteqqillugu, ukiumi siullermi unitsitsisimasutut ukiullu tulliani ingerlatsisutut naatsorsorneqarput.
Ilinniagaq
ataaseq pineqaraluartoq ilinniakkat ilai assigiinngitsunik ilisarnaasersugaapput.
Ilinniagaq ataaseq assigiinngitsunik ilisarnaasersugaq
sapinngisamik ilisarnaammut
ataatsimut ingerlatinniarneqarpoq.
Naatsorsuineq
Ilinniakkat
killiffiinut kisitsisitigut
paasissutissat ilinniakkat aallartinneraniit ukiut tulliuttut 1-10 qaangiunnerini suli ilinniakkamik ingerlatsisutut, naammassinnissimasutut
unitsitsisimasutulluunniit naatsorsorneqarput.
Tabelini ilinniarnermi killiffiit naatsorsukkat tassaapput:
· Ilinniakkami aallartinneqarsimasumi killiffik.
· Ilinniakkap qaffasissusaani aallartinneqarsimasumi killiffik.
Tabelimi kingullermi ilinniartut ilinniakkap qaffasissusaani ataatsimi ilinniakkap sammivianik allanngortitsisut sillimaffigineqarput.
Kisitsisitigut paasissutissani pineqartuni ilinniakkap qaffasissusaa, nuna ilinniarfik suiaassuserlu malillugit naatsorsuisoqarpoq.
Killiliinerit erseqqissagassallu
”Unitsitsinermut” killiffimmi ilinniakkamik unitsitsigallartut ilaapput.
Kisitsisini paasissutissani matumani ilinniakkat killiffii ilinniakkami pineqartumi ilinniakkallu qaffasissusaani pineqartumi taamaallaat naatsorsorneqarput. Ilinniakkamik unitsitsisut unitsitsereernerup kingorna ilinniakkap qaffasissusaani allami ilinniakkamik allamik aallartitsillutillu naammassinnissimasinnaapput.