Ilinniartitaaneq
Kalaallit Nunaanni innuttaasut ukiut qulit meeqqat atuarfianni atuarsimasussaatitaapput. Meeqqat arfinilinnik ukioqaleraangamik atuartunngortarput. Nunaqarfinni minnerusuni meeqqat 8.-10. klasserniarlutik illoqarfimmut qaninnermut nuukkajuttarput. 1. klassimiit qallunaatut atuartitsisoqartarpoq, tuluttullu atuartitsineq aamma klassini nukarlerni aallartinneqartarluni. 10.klassimik naammassinnereernerup kingorna atuartut affaasa missaanniittut Kalaallit Nunaanni Danmarkimiluunniit ukiumik ataatsimik sivisussuseqartumik efterskolernermik aallartitsisarput.
Atuartut arfineq-marluugaangata ataaseq kisimi inuusuttunut ilinniarfimmut toqqaannartumik ingerlaqqittarpoq. Inuusuttut amerlasuut inuusuttunut ilinniarfimmik aallartitsiniarlutik illoqarfimmut allamut nuuttarput.
Illoqarfinni sisamani ilinniarnertuunngorniarfeqarpoq, inuussutissarsiornermilu ilinniarfinni arfiniliusuni inuussutissarsiornermi ilinniakkat amerlanerpaat ilinniarneqarsinnaapput. Inuussutissarsiornermi ilinniakkat atuagarsornermik suliffimmillu misiliinermik akulerunneqarsimasunik imaqarput.
Kalaallit Nunaanni inuusuttut amerlasuut inuusuttunut ilinniakkamik aallartitsisanngillat. 18-25-t akornanni ukiullit quliugaangata arfinillit ilinniarnertuunngorniarnermik imaluunniit inuussutissarsiornermi ilinniakkamik allamik naammassinnissimasanngillat imaluunniit suli ingerlatsisutut nalunaarsorsimasarlutik.
Kalaallit Nunaanni universiteti, Ilisimatusarfik, illoqarfiit pingaarnersaanni Nuummi inissisimavoq. Tassani bacheloritut ilinniakkat aqqanillit kandidatitullu ilinniakkat sisamat ilinniarneqarsinnaapput. Ingerlariaqqiffiusumik ilinniakkat naannerusut inuussutissarsiornermi ilinniarfiit ilaanni aamma ilinniarneqarsinnaapput. Ingerlariaqqiffiusumik ilinniakkat Kalaallit Nunaanni neqeroorutigineqartut arlaqanngimmata, ilinniartut 30 pct.-ii nunani allani ilinniartuupput. Amerlanerpaartaat Danmarkimi ilinniarput.
Ilinniarneq akeqanngilaq, ilinniartullu ilinniagaqarnersiuteqartinneqarput. Suliffimmi misiliillutik ilinniartut suliffimmi misiliisutut akissarsiaqartinneqartarput. Ilinniartut illoqarfimmut allamut nuuttariaqarsimasut kollegiani ineqarnissaminnut pisussaaffeqarput.
